Xorazm Maʼmun Akademiyasi
VIII
asr oxiri IX asr boshlarida xalifalikning markazi Bagʻdodda ilm-fan
rivojlandi. Xalifa Xorun ar-Rashidning oʻlimidan soʻng (813 yil), uning
oʻgʻli al-Maʼmun xalifa etib tayinlandi. U xalifa sifatida Bagʻdodga
koʻchgach (819 yil), u yerda ilmiy Markaz tashkil etib, unda barcha
musulmon oʻlkalardan olimlarni toʻpladi. Bu ilmiy Markaz tarixda «Bayt
ul-hikma» («Donishmandlar uyi») nomi bilan mashhurdir.
Bu yerda asosan riyoziyot, tibiyot, ilmi-nujum, joʻgʻrofiya, astrologiya, handasa va shunga oʻxshash boshqa fanlar oʻrgatilgan.
Xorazmshoh Maʼmunning oʻgʻli Ali ibn Maʼmun taklifi bilan 1004 yilda
Gurganchda (Qoʻhna Urganch) «Dorul hikma va maorif» nomli ilmiy
muassasa shakllanadi. Bu yerga ibn Iroq va Beruniyning takliflari bilan
har tarafdan olimlar kela boshlaganlar. Bu yerda ilmning barcha
sohalari boʻyicha ilmiy izlanishlar olib borilgan. Yunon tillaridan
tarjimalar ham qilingan.
XVIII asr frantsuz entsiklopedistlari al-Maʼmun faoliyatini va
Bagʻdoddagi «Bayt ul-hikma»ning faoliyatini oʻrganib chiqib, uni
Afinadagi Platon Akademiyasiga juda oʻxshatganlar va «Bayt ul-hikma»ni
«al-Maʼmun Akademiyasi» deb ataganlar. Gurganchdagi «Dorul-hikma» esa
«Ikkinchi Akademiya» boʻlib qoldi.
Maʼmun Akademiyasining faoliyati 1017 yilda Mahmud Gʻaznaviy bosqini tufayli tugatiladi. Xorazm Maʼmun Akademiyasini qaytadan tashkil qilish toʻgʻrisida Farmon
Mustaqilligimiz sharofati tufayli Prezidentimizning tashabbusi bilan
bu Akademiya qayta tiklandi. Prezidentimizning Xiva shahrining 2500
yillik tantanalarida soʻzlagan nutqlarida Xorazm Maʼmun Akademiyasini
qayta tiklash haqidagi taklifi va 1997 yil 11 noyabrdagi Farmoni bilan
Xiva shahrida Xorazm Maʼmun Akademiyasi qaytadan tashkil qilindi.
Oʻzbekiston Respublikasi Prezidentining Xorazm Maʼmun Akademiyasini qaytadan tashkil etish toʻgʻrisidagi Farmonidan:
Oʻzbekistonning ilmiy saloxiyatini yuksaltirish, uning jahon ilmiy
hamjamiyatidagi oʻrnini mustahkamlash, mintaqalarda fanni yanada
rivojlantirish hamda is’tedodli va fidoiy olimlarni har tomonlama
qoʻllab quvvatlash, yuqori intellektual muhit yaratishdagi milliy
anʼanalarni rivojlantirish, qadimda fan, maʼrifat va madaniyat
olamining markazi hisoblangan, odamzot tarixidagi ilk akademiyalardan
boʻlmish Xorazm Maʼmun Akademiyasini qaytadan tashkil etish maqsadida:
Xorazm Maʼmun Akademiyasi — Oʻzbekiston Respublikasi Fanlar akademiyasining mintaqaviy boʻlimi Xiva shahrida tashkil etilsin.
Xorazm Maʼmun Akademiyasining asosiy ilmiy va tashkiliy vazifalari quyidagilar deb belgilansin:
- ilm-fan sohasidagi qadimgi ulug milliy meros asoslarida yuqori
intellektual muhitni yaratishdagi boy anʼanalarni tiklash va
rivojlantirish, yosh is’tedodli olimlarni izlab topish, ularni
Akademiya faoliyatiga jalb etish va ilmiy ijodlarining samaradorligini
yuksaltirish;
- qadimgi milliy ilm-fan sohasidagi boy merosni har tomonlama
oʻrganish va tahlil qilish, tarix, arxeologiya, falsafa, til va
adabiyot, biologiya va biotexnologiya sohalarida fundamental
izlanishlarni olib borish, zamonaviy ilmiy maktablar yaratish va fan
yutuqlarini amaliyotga tabiq etish;
- mintaqada ilm-fan bilan bogʻliq barcha ishlarni zamon talablari darajasida muvofiqlashtirish;
- oliy malakali ilmiy va ilmiy-pedagogik kadrlarni tayyorlash;
- Kadrlar tayyorlash boʻyicha milliy dasturni amalga oshirishda
faol ishtirok etish, uzluksiz taʼlim tizimi va fan oʻrtasidagi uzviy,
oʻzaro manfaatli aloqalarni oʻrnatish, akademik litseylarda ilmiy
pedagogik faoliyatni yuqori saviyada olib borish;
- xalqaro ilmiy hamkorlikni rivojlantirish…
Toshkent, 1997 yil 11 noyabr.
Xorazm Maʼmun Akademiyasining hozirgi davrdagi faoliyati
Hozirda Xorazm Maʼmun Akademiyasi tarkibida «Arxeologiya, tarix va
falsafa», «Biologiya muammolari» va «Til va adabiyot» boʻlimlari
faoliyat koʻrsatmoqda. Akademiyaga Urganch Davlat universiteti rektori,
akademik Sadullaev Azimboy Sadullaevich rahbarlik qilmoqda. Unga ilmiy
ishlar boʻyicha rais muovini, biologiya fanlari doktori, professor
Safarov Karimjon Safarovich yordam bermoqda. Akademiyada ilmiy tadqiqot
ishlarini bajarishda 31 ilmiy xodim, 5 fan doktori va 9 ta fan
nomzodlari qatnashmoqdalar.
«Arxeologiya, tarix va falsafa» boʻlimida uchta mavzu-"Xorazmda
qadimgi va oʻrta asrlar oʻzbek davlatchiligi tarixi", «Oʻzbek xalqining
etnik tarixida Xorazm vohasining oʻrni», «IX-XIII asrlarda Xorazmda
ilmiy-madaniy koʻtarilish jarayonida Xorazm Maʼmun Akademiyasining
tarixiy xizmati», «Til va adabiyot» boʻlimida esa «IX-XIII asrlarda
Movarounnahr va Xorazmdagi adabiy va lisoniy muhit» mavzusi boʻyicha
ilmiy-tadqiqot ishlari olib borildi.
«Biologiya muammolari» boʻlimida ham toʻrtta dolzarb mavzu boʻyicha
tadqiqot ishlari bajarildi. Bular quyidagilar: «Respublika
shimoliy-gʻarbiy mintaqasida qishloq xoʻjaligi ekinlarining istiqbolli
navlarini oʻrganish», «Mahalliy qishloq xoʻjalik xom ashyosi asosida
vitaminli omuxta yem olish texnologiyasini ishlab chiqish», «Amudaryo
quyi oqimida tuproq hosil boʻlishi jarayoni xususiyatlarini oʻrganish»,
«Xorazm vohasi termitlarining faunasi va ekologik-populyatsion
tavsifi». Koʻrinib turibdiki, har uchala boʻlimdagi tadqiqot ishlari
oʻta dolzarb va muhimdir. Quvonchlisi shundaki, jamoamiz murakkab
jarayonlarni boshidan kechirishga toʻgʻri kelgan boʻlsada, qunt,
hafsala, sabr-bardosh bilan ishlab, izlanib, asosiy ilmiy-tadqiqot
ishlarini yakunlashga erishdilar.
«Arxeologiya, tarix va falsafa» boʻlimida 21 ta, «Til va adabiyot»
boʻlimida 16 ta, «Biologiya muammolari» boʻlimida 15 ta ilmiy,
ilmiy-ommabop maqolalar, risolalar chop etildi. Shuningdek, turli
tavsiyalar ishlab chiqildi.
Olimlarimizning izlanishlari natijasida Xorazm viloyatida
amarantning 4 turi va soyaning 2 navi oʻstirildi. Amarant biomassasidan
senaj va silos tayyorlash boʻyicha tavsiyalar tayyorlandi. Shuningdek,
amarant urugʻlaridan kraxmal olish usuli ishlab chiqildi va patent
olish uchun zarur hujjatlar tayyorlandi. Dukkakli don ekinlaridan 11,
poliz ekinlaridan 5, moyli ekinlardan 4, yuksak suv oʻsimliklaridan 3,
texnik ekinlardan 6 ta navlari viloyatimiz qishloq xoʻjaligida
qoʻllanishga tavsiya qilindi.
Xalqaro hamkorlik aloqalari haqida ham aytib oʻtish joiz: Rossiya
Fanlar Akademiyasi va qozogʻistonlik olimlar bilan «Yangi va noanʼaviy
oʻsimliklar hamda ulardan foydalanishning istiqbollari»,
turkmanistonlik olimlar bilan Orolboʻyi hududidagi dehqonchilik
muammolari boʻyicha hamkorlik davom etyapti. Biotexnologiya va tabiiy
mahsulotlar Xalqaro Akademiyasi bilan hamkorlik qilishga kelishib
olindi. «Markaziy Osiyo xalqlari tarixini oʻrganish» Frantsiya
instituti bilan ilmiy aloqalar keng yoʻlga qoʻyilganligi esa ayniqsa
quvonchlidir. «Til va adabiyot», «Arxeologiya, tarix va falsafa»
boʻlimlarida olib borilgan va yakunlangan ilmiy-tadqiqot ishlari ham
shu paytgacha mavjud boʻlgan maʼnaviyat, maʼrifat, madaniyat
manbalarini boyitishga xizmat qilishi eʼtirof etildi. Bular, albatta,
bizning dastlabki yutuqlarimiz va biz ularni muttasil koʻpaytirib
borish zarurligini doimo his qilib turibmiz.
2000 yilning fevral oyidan boshlab bioximiya, oʻsimliklar
fiziologiyasi ixtisosliklari boʻyicha nomzodlik dissertatsiyalari
tayyorlashga ruxsat qilindi. Yaqin orada boshqa fanlar boʻyicha ham
aspiranturaga qabul qilinadi.
Hozirgi kunda K.Xudayberganov, N.Oʻrozboeva, X.Yusupov, A.Rahimov,
I.Abdullaev kabi iqtidorli yoshlar nomzodlik dissertatsiyalari ustida
ish olib borishyapti.
Akademiyada qadim qadriyatlarimizni ulugʻlovchi, diyorimizda
tavallud topgan buyuk siymolarimiz hayoti va faoliyatining yangi
qirralarini ochib beradigan, shu bilan birga ilm-fan, xalq xoʻjaligi
taraqqiyotiga dahldor, ekologiyani yaxshilashga oid qator anjumanlar
koʻplab oʻtkazilmoqda. Bu borada gap ketganda ilk akademiya asoschisi,
buyuk alloma Abu Rayhon Beruniyning hayoti va ijodiy faoliyatiga
bagʻishlangan ilmiy kengashlar oʻtkazish odat tusiga kirib qolganligi
alohida aytib oʻtish lozim deb bilaman. Joriy yilda shu munosabat bilan
uchta tadbir oʻtkazildi.
Respublika va xalqaro miqyosda yirik anjumanlar boʻlib oʻtmoqda.
«Ekosan»- Ekologiya va salomatlik xalqaro jamgʻarmasi, Xorazm viloyati
hokimligi, Maʼmun Akademiyasi va «Ekosan» Toshkent klubi bilan
hamkorlikda «Xorazm vohasi ijtimoiy ekologik taraqqiyotidagi muammolar
va uning istiqbollari», shuningdek nufuzli tashkilotlar va oʻquv
yurtlari bilan hamkorlikda Xorazmda ilk davlatchilikning vujudga
kelishi va bu borada olib borilayotgan tadqiqotlar, buyuk
vatandoshlarimiz Jaloliddin Manguberdi tavalludining 800 yilligi,
Ogahiy tavalludining 190 yilligini, «Avesto» asari yaratilganligining
2700 yilligi, «Jahon madaniyati xalqaro tinchlik uchun» mavzularidagi
ilmiy-amaliy anjumanlarni alohida taʼkidlab oʻtishni istardim.
Mamlakatimiz taraqqiyotiga, tinchlikni mustahkamlashga oid bunday
anjumanlar oʻtkazish bundan buyon ham diqqat markazimizda boʻladi.
Akademiyaning «Nashriyot va matbaa birlashmasi» da olimlarimizning
ilmiy izlanishlari, monografiyalar, ilmiy toʻplamlar, aspirantlarning
dissertatsiya ishlari, akademiyaning muhim hujjatlari endilikda oʻzida
chop etiladi. Shuningdek, oʻn bosma taboqqacha boʻlgan mualliflar
asarlarini ham chop qilinishi mumkin. Turli hisob-kitob varaqalari,
taklifnomalar, bukletlar tayyorlanadi. Akademiya xodimlarining xalq
xoʻjaligini rivojlantirish, turmush farovonligini oshirish, maʼnaviy
kamolatga xizmat qiladigan ilmiy ishlari imtiyozli ravishda chop etib
berilyapti.
Shu paytgacha 16 ta risola va ilmiy-ommabop ishlar chop etilib, bir yarim million soʻmlik ish bajarildi.
Hozirgi davrdagi muammolar: zarur manbalar, adabiyotlar
«Arxeologiya, tarix va falsafa», «Til va adabiyot» boʻlimlari ish
samaradorligini oshirish uchun shu fanlarga oid kitoblar, qoʻlyozma
manbalarini Rossiya, Angliya, Turkiya, Misr, Eron, Pokiston, Ozarbayjon
kabi mamlakatlardan keltirish masalasini hal qilish zarur. Internet
tizimiga ulanib, sohalar boʻyicha yetakchi ilmiy muassasalar bilan
hamkorlikni yanada mustahkamlashni davr taqozo etyapti. Tajriba ishlab
chiqarish bazasini mustahkamlash maqsadida texnika vositalari kerak.
Bozor iqtisodiyoti sharoiti davrida Xorazm viloyatida qishloq
xoʻjaligini keskin rivojlantirish, ekologik muhitni yaxshilash, aholi
salomatligini tiklash va mustahkamlash oʻta hayotiy, kechiktirib
boʻlmas vazifa ekanligini nazarda tutib, Xorazm Maʼmun Akademiyasi
tarkibida «Qishloq va suv xoʻjaligi», «Ekologiya va tibbiyot»
boʻlimlarini tashkil etish nihoyatda zarur. (Xorazm Maʼmun Akademiyasi
raisi muovini, biologiya fanlari doktori, professor K.S.Safarovning
jurnalistlarga bergan intervyusidan olindi).
|